குரு வக்ரப் பெயர்ச்சி 2025 – குருவின் நிலை, அங்க சாயல் மற்றும் அதன் ஆன்மீக அர்த்தம்

குரு வக்ரப் பெயர்ச்சி 2025 – குருவின் நிலை, அங்க சாயல் மற்றும் அதன் ஆன்மீக அர்த்தம்

குரு பகவான் அறிவு, ஞானம், அதிர்ஷ்டம், செல்வம், மங்களகரமான நிகழ்வுகள், குழந்தை பாக்கியம் ஆகியவற்றின் காரகராக விளங்குகிறார். அவர் நவம்பர் 11, 2025 அன்று வக்ர நிலையில் பயணிக்கத் தொடங்குகிறார். நவம்பர் 11, 2025 முதல் மார்ச் 11, 2026 வரை சுமார் 4 மாதங்கள் குரு பகவான் வக்ர நிலையில் இருப்பார். ஒரு கிரகம் வக்ரமடையும் பொழுது அதன் பலன்கள் தீவிரமடையும் என்று நம்பப்படுகிறது. இந்த வக்ர பெயர்ச்சி குருவின் உச்ச ராசியான கடகத்தில் நிகழ்கிறது. குரு உச்சம் பெறும் ராசியில் வக்ரமடைவது மிக முக்கியத்துவம் வாய்ந்த நிகழ்வாக கருதப்படுகிறது. இப்படிப்பட்ட சிறப்பு வாய்ந்த குருவைப் பற்றி இப்போது பார்ப்போம்.

குரு பகவானை நாம் கோயில்களில் மேலோட்டமான ஒரு கண்ணோட்டத்தோடு கண்டிருப்போம். ஆனால் அந்த குரு பகவானின் அமைப்பில் உள்ள ரகசியங்களை இதில் நான் விளக்கி உள்ளேன். குரு பகவானின் உடல் நிலை, கரங்களின் சாயல், முகத்தின் திசை, மற்றும் அவை குறிக்கும் ஆன்மீக அர்த்தம் பற்றிய விரிவான விளக்கம். குரு வடிவம் எப்படி ஞானத்தை வெளிப்படுத்துகிறது என்பதையும் அறிந்துகொள்வோம். இவை அனைத்தும் ஞானத்தின் பரிமாணங்களை வெளிப்படுத்துகின்றன. இக்கட்டுரையில் அந்த ஆன்மீகப் பொருளை விரிவாகப் பார்ப்போம். 

 

அருள்மிகு தட்சிணாமூர்த்தி / குரு பகவான் / சிவபெருமான் / ஆசிரியர்

 

வேதத்தின் பார்வையில், இந்த படைப்பு கடவுளின் வெளிப்பாடாகும். இதற்கு காரணகர்த்தாவாக இருப்பதால், அவர் அனைத்து அறிவின் வடிவமாகவும், குறிப்பாக ஆன்மீக அறிவின் வடிவமாகவும் திகழ்கிறார். இப்படிப்பட்டவருக்கு ஒரு பெயர் உண்டு என்றால் அவரே அருள்மிகு தட்சிணாமூர்த்தி ஆகும்.

அருள்மிகு தட்சிணாமூர்த்தியாகக் காட்சியளிக்கும் இந்த கடவுள், எட்டு அம்சங்களைக் கொண்டவர். முதல் ஐந்து அம்சங்கள் பஞ்சபூதங்கள் ஆகும். வேதங்களில் உலகம் பஞ்சபூதங்களின் வடிவில் விளக்கப்படுகிறது. அவை: ஆகாசம், காற்று, நெருப்பு, நீர் மற்றும் பூமி.

இந்த வேதப் பிரபஞ்ச மாதிரியில், பஞ்சபூதங்கள் கடவுளிடமிருந்து பிரிக்க முடியாதவை. உண்மையில், இந்த பஞ்சபூதங்களே கடவுள் வடிவில் உள்ளது, அதுவே இந்த பிரபஞ்சம் ஆகும்.

இதுபோக, சூரியன் மற்றும் சந்திரன் என இரு வேறு அம்சங்கள் உள்ளன.

ஒரு தனிநபராக நான் இந்த உலகத்தைப் பார்க்கும்போது, வானத்தில் தனித்துவமாகத் தெரிபவை சூரியனும் சந்திரனும் ஆகும். சந்திரன் பூமியைத் தவிர மற்ற அனைத்து கிரகங்களையும் குறிக்கிறது, மேலும் சூரியன் அனைத்து ஒளிரும் கோள்களையும் குறிக்கிறது.

எட்டாவது அம்சமே நாம், அதாவது ஜீவன் – இந்த உலகைப் பார்ப்பவன். இந்த எட்டு அம்சங்களும் ஒரே முழுமையாகப் புரிந்து கொள்ளப்பட வேண்டும். இதுவே கடவுள்.

நாம் தட்சிணாமூர்த்தியின் திருவுருவத்தைப் பார்க்கும்போது, பஞ்சபூதங்களின் குறியீடுகளைக் காணலாம்.

1. ஆகாயம் (வெற்றுவெளி), அவரது வலது கையில் உள்ள உடுக்கையால் குறிப்பிடப்பட்டுள்ளது. வெற்றுவெளி உடுக்கைக்குள் அடைக்கப்பட்டுள்ளது, இது சப்தம் ஏற்பட உதவுகிறது
2. அடுத்து, வாயு (காற்று) தட்சிணாமூர்த்தியின் தலைமுடி மற்றும் அதைச் சுற்றியுள்ள தலைப்பட்டையால் குறிக்கப்படுகிறது. காற்று வீசும்போது முடியை நிலைநிறுத்த தலைப்பட்டி உதவுகிறது
3. அவரது இடது கையில், நெருப்பைக் குறிக்கும் ஒரு தீப்பந்தத்தைக் காண்பீர்கள்
4. நீர், கங்கை நதியாக, ஒரு தேவியின் வடிவில், தட்சிணாமூர்த்தியின் தலையில் காட்டப்படுகிறது
5. பூமி, முழு சிலையாலும் குறிக்கப்படுகிறது

அங்கு சனகர், சனந்தனர், சனாதனர் மற்றும் சனத் சுஜாதர் போன்ற ஜீவாத்மாக்கள், சிலையின் அடியில் தட்சிணாமூர்த்தியின் சீடர்களாக அமர்ந்திருக்கிறார்கள்.

சூரியனும் சந்திரனும் கடவுளின் வடிவத்தில் காட்டப்பட்டுள்ளன. தட்சிணாமூர்த்தியின் இடது பக்கத்தில் ஒரு பிறை சந்திரனையும், வலது பக்கத்தில் சூரியனைக் குறிக்கும் ஒரு முழு வட்டத்தையும் காணலாம்.

எனவே, இந்த எட்டு காரணிகளின் அதிபதியான, முழுமையான கடவுளான “அட்ட மூர்த்தி” உருவாக்கும் பஞ்சபூதங்கள், இரண்டு கோள்கள் மற்றும் ஜீவன் ஆகியவற்றை நாம் பார்க்கிறோம். “அட்ட மூர்த்தி” என்பது சிவபெருமானின் எட்டு வடிவங்களைக் குறிக்கும். ஏனெனில் தட்சிணாமூர்த்தி என்பது சிவபெருமானின் குரு வடிவத்தைக் குறிக்கும்.

நீங்கள் தட்சிணாமூர்த்தியை “அட்ட மூர்த்தி” ஆக, கடவுளாக வழிபடலாம், அல்லது அவரை ஒரு ஆசிரியராக மனதில் உருவகப்படுத்திக் கொள்ளலாம். ஏனெனில் அவர் ஒரு ஆசிரியர் வடிவத்திலும் இருக்கிறார். அவர் அமர்ந்திருக்கும் ‘ஆசனம்’ ஆசிரியரின் ஆசனம் ஆகும். அவர் என்ன கற்பிக்கிறார்? அவரது கை முத்திரையைப் பாருங்கள். அது அவர் கற்பிப்பதை உணர்த்துகிறது. நாம் மற்றவர்களைச் சுட்டிக்காட்டப் பயன்படுத்தும் ஆள்காட்டி விரல், ‘அகங்காரம்’, அகங்காரத்தைக் குறிக்கிறது.

மற்ற மூன்று விரல்கள் உங்கள் உடல், மனம் மற்றும் புலன் உறுப்புகள் ஆகியவற்றைக் குறிக்கின்றன. அவை ஸ்தூலம், சூட்சுமம் மற்றும் காரண உடல்கள் என்ற மூன்று உடல்களாகவும் காணப்படலாம். ஜீவன் தன்னைத்தானே தவறாகக் கருதுவது இதுதான். கட்டைவிரல், கடவுளைக் குறிக்கிறது, அதாவது “தலைவன்/முதல்வன்”. இது கையின் மற்ற விரல்களிலிருந்து விலகி இருக்கும், அதே சமயம், கட்டைவிரல் இல்லாமல் மற்ற விரல்களுக்கு வலிமை இல்லை.

தட்சிணாமூர்த்தியின் வலது கையில் உள்ள இந்த ‘முத்திரை’யில், கட்டைவிரல் மற்ற விரல்களுடன் இணைந்து ஒரு வட்டத்தை உருவாக்குகிறது. இதன் மூலம், உடம்பு, மனம் மற்றும் புலன்கள் தான், தான் என்று கருதும் ஜீவன் தான், உண்மையில் முழுமையானவன் என்று கற்பிக்கப்படுகிறது. இந்த வட்டக் கை முத்திரை, “நீ அதுவாக இருக்கிறாய்” என்ற முழு உபதேசத்தையும், போதனையையும் காட்சி ரீதியாகக் கூறுகிறது. ஒரு வட்டத்திற்கு ஆரம்பமோ முடிவோ இல்லாதது போல, நீங்கள் முழுமையானவர். அது உங்களைப் பற்றி விளக்கும் வார்த்தைகளில் இறுதியான வார்த்தையாக அமையும். அந்தப் பார்வையை யாராலும் மேம்படுத்த முடியாது; எந்த கலாச்சாரமும் அதை மேம்படுத்த முடியாது.

சொர்க்கத்தில் கூட அதை மேம்படுத்த முடியாது, ஏனென்றால் அந்த முழுமையில் சொர்க்கமும் அடங்கும். அதனால் இறுதியாக கூற வேண்டும் என்றால் நீங்கள் தான் அனைத்துமே. அதை நீங்கள் அறிவது நல்லது. தட்சிணாமூர்த்தி தனது இடது கையில் வைத்திருக்கும் பனை ஓலைகளின் மூலம் இந்த போதனைகள் வேதங்களில் அடங்கியுள்ளதாக குறிப்பிடப்படுகிறது. இதைப் புரிந்து கொள்ள, சில மதிப்புகள் மற்றும் அணுகுமுறைகளை உள்வாங்கிக் கொண்டு, சரியான மற்றும் நிலையான முறையில் சிந்திக்கும் திறனை வளர்த்துக் கொண்ட ஒரு மனம் உங்களுக்குத் தேவை.

இது ‘ஜப-மாலை’ மூலம் குறிக்கப்படும் பல்வேறு ஆன்மீக ஒழுக்கங்களால் பெறப்படலாம். கடவுள், தானே ஒரு ஆசிரியர், ஒரு குரு என்பதால், எந்த ஆசிரியரும் அறிவின் ஆதாரமாகவே பார்க்கப்படுகிறார். மேலும் ஆசிரியரும் ஈஸ்வரனை, கடவுளை அறிவின் ஆதாரமாகக் கருதவேண்டும். கடவுள் தானே ஆசிரியர், முதல் குரு என்பதால், ஒரு போதனை பாரம்பரியம் உள்ளது, எனவே கற்பித்தலில் தனிப்பட்ட அகங்காரம் எதுவும் இல்லை.

தட்சிணாமூர்த்தி ஒரு காளையின் மீது அமர்ந்திருக்கிறார், இது அறியாமைக்குக் காரணமான மாயையின் குணமாகிய ‘தமஸ்’ஸைக் குறிக்கிறது. இது உலகின் முழு படைப்பு சக்தியாகும், மேலும் தட்சிணாமூர்த்தி இந்த மாயையைக் கட்டுப்படுத்துகிறார்; இந்த அறிவைத் தேடும் உங்கள் பாதையில் தடைகள் இருக்கவே செய்யும். தட்சிணாமூர்த்தி சாத்தியமான அனைத்துத் தடைகளையும் கட்டுப்படுத்துகிறார்.

அவரது காலின் கீழ், அவரது கட்டுப்பாட்டில், ‘அபஸ்மாரா’ என்ற ஒருவன் இருக்கிறான் – இவன் உங்கள் வாழ்க்கையில் தடைகளை ஏற்படுத்துபவன். நமக்கு எவ்வளவுதான் தடைகள் வந்தாலும் கடவுளின் அருளால் நாம் அதை கவனித்து விலக்கி வைத்து அது நம்மை ஆட்கொள்ளாத வண்ணம் காக்கும் என்பதை இது உணர்த்துகிறது. தடையற்ற வாழ்க்கை என்று எதுவும் இல்லை, ஆனால் தடைகள் உங்களை திசை திருப்ப வேண்டியதில்லை; நீங்கள் அவற்றைக் கட்டுப்பாட்டில் வைத்திருங்கள்.

இவ்வாறு, தட்சிணாமூர்த்தியின் முழு வடிவமும், அனைத்து அறிவின் ஆதாரமாகிய, எல்லாவற்றிற்கும் ஆதாரமாகிய, முழுமையானவராகிய கடவுளை வரவழைக்கிறது, மேலும் நீங்களே அந்த முழுமை என்பதை அவர் உங்களுக்குக் கற்பிக்கிறார். அவரே தட்சிணாமூர்த்தி, ஆசிரியரின் வடிவில், குரு-மூர்த்தியாக இருப்பவர்.

அந்த மூலத்தை (ஆதாரத்தை) உங்களுக்குள்ளேயே கண்டறிய உங்கள் அனைவருக்கும் அவரது திருவருள் கிடைக்க வேண்டுகிறோம். இந்த சுய அறிதல் (self-discovery) உங்கள் தேடலாக இருந்தால், உங்கள் முழு வாழ்க்கையும் பயனுள்ளதாகவும், மேன்மை மிக்கதாகவும் மாறும். இந்த சுய அறிதலுக்கான திட்டம், அனைவரின் இலக்காகவும் இருக்க வேண்டும். அதுவே மனித வாழ்வின் வேத நெறிப்பட்ட குறிக்கோளாகும்.

இந்த கட்டுரையில் எந்த இடத்திலும் நான் இறைவன் என்று குறிப்பிட்டிருக்க மாட்டேன். அதற்கு காரணம்,”கடவுள்” என்ற வார்த்தையானது கட+உள் – “கட” (கடந்து நிற்பவர்) மற்றும் “உள்” (உள்ளே இருப்பவர்) ஆகிய இரண்டு சொற்களிலிருந்து வந்தது, இது அனைத்து உயிர்களுக்கும் உள்ளேயும் புறமும் இருப்பவரைக் குறிக்கிறது. நாமே கடவுள் நமக்குள்ளேயே நாம் கடவுளை தேட வேண்டும். வெளியில் அல்ல. குருவின் ஒவ்வொரு அசைவிலும், ஞானம் தங்கியிருக்கிறது; பார்க்கும் மனம் சுத்தமாய் இருந்தால், போதனையும் உயிருடன் வெளிப்படும்.

இந்த குரு வக்ர பெயர்ச்சியில் வாசகர்களுக்கு தெரியாத ஒரு அற்புத குரு பரிகார தளத்தை பற்றிய காணொளியை இங்கு பகிர்ந்துள்ளேன். கீழ்காணும் தொடர்புகளை அழுத்தி கண்டு தரிசிக்கவும். நேரம் இருக்கையில் தவறாமல் சென்று வரவும். நன்றி🙏

~ ~ ~ ~ ~ ~ ~ ~ குருவை அறிவோம்~ ~ ~ ~ ~ ~ ~ ~ குருவை மறவோம்~ ~ ~ ~ ~ ~ ~ ~

– Dr. ஆ.சி.க. செந்தில்

B,Sc.,(Maths), GNIIT(Software-Multimedia Development), ADCHM, DWD, MAcu., International MBA (IT), Software Testing

நிர்வாக இயக்குனர் – ஆன்மீக மாத இதழ் கோவில் முரசு

மேலும் இதுபோன்ற கட்டுரைகள் வேண்டுமா? உங்கள் கருத்துகளை பகிரவும் மற்றும் கோவில் முரசு ஆன்மீக மாத இதழுக்கு சந்தா கட்டி பயன்பெறவும். வருடத்திற்கு வெறும் ரூ.400 மட்டுமே.